A la atención del Sr. Presidente de la Federación d’Espeleoloxía del Principáu d’Asturies.

Sr Presidente:

Muncho bien conoz vusté’l nuesu esmolecimientu pola llaceriosa situación na que s’afaya’l nuesu deporte n’Asturies; situación yá irreversible y ensin igua dala al nuesu entender, de magar que dende esta Federación s’anecia nuna actitú que nós camentamos fondamente reaicionaria y centraliega.

Foi vusté’l qu’escoyó tirar pel camín de la manipulación y la opacidá informatives y ye vusté’l que ta dexando n’herencia una espantible cadarma de lo que pudo ser una Federación deportiva fresca, imaxinativa, ambiciosa, abierta y modélica. Y eso ye dalgo que yá enxamás podrá ser, porque vusté fizo y ta faciendo una pergrave dexación de les propies competencies y posibilidaes de desendolcu de la nuesa actividá n’Asturies a mayor gloria d’una cierta idea de Federación estatal ríxida y verticalizada na que nun cabe l’aire fresco de les voces y opiniones estremaes a la de so. Siga vusté xugando a «dexalo too atao y bien atao» texendo los sos convenios y reglamentaciones ensin contar nin siquier colos propios deportistes que lu sofiten y durma tranquilu sabiendo de la santificación de too ello pol CSD... hai otra xente que fizo y fai como vusté, anque sábese bien qu’eso a la fin nun dexa más que povises.

Poro, en cuenta la situación y les circunstancies poles que traviesa’l nuesu deporte y en cuenta tamién de la indefinición organizativa d’esta Federación y el nuesu calter d’espeleólogos activos y miembros de l’Asamblea Xeneral d’esta Federación Asturiana d’Espeleoloxía del Principáu d’Asturies, los abaxo firmantes queremos encamentái que:

1.- Esvenceye dafechu a los abaxo firmantes de cualisquier aspeutu consultivu, organizativu o direutivu que tenga que ver cola xestión d’esta Federación d’Espeleoloxía del Principáu d’Asturies, quedando bien afitao que los abaxo firmantes -anque espeleólogos activos y miembros de l’Asamblea Xeneral d’esta Federación Asturiana d’Espeleoloxía del Principáu d’Asturies-, mos negamos a asumir cualisquier mena de responsabilidá deportiva, moral, personal o patrimonial que pudiera derivase de la citada situación.

2.- Esvenceye darréu a D. Jesús Fernando Manteca Fraile de la cadarma direutiva de l’Espeleosocorru nesta Federación, quedando bien afitao que l’abaxu firmante nun quier continuar figurando oficialmente como "suplente del coordinador del Grupo de Espeleosocorro Asturiano" y declina cualisquier mena de responsabilidá deportiva, moral, personal o patrimonial que pudiera derivase d’una situación d’emerxencia en cavidaes –mesmo que’l restu los abaxo firmantes-, daes les actuales circunstancies.

3.- Remita al nuesu Grupu razón detallao de la situación d’esta Federación nos caberos cinco años, emitiendo los correspondientes informes de calter económicu y de xestión, yá que los abaxo firmantes nun tenemos conocencia de la situación real de la mesma, nun habiendo aprobao nin dao consentimientu a informe de xestión nin balance económicu dalgún nos caberos cinco años, de lo que equí dexamos constancia espreso.